«Укхаза цхьаккха кӀалха кӀийле йолаш хӀама дац, е из пайда бар духьа деш а дац. Гуцаранаькъан Сафарбика Микаила лаьрхӀад, ший къаман совгӀат де. Вайгара эшар да, из дика гӀулакх хьаллацар», - аьлар Келаматанаькъан Махьмуд-Ӏаьлас. Ний яхача дӀаяхача заман юрта гӀалгӀай доккхача Йовлой тайпан овла ба. Цудухьа тамаш елга дац; мехка кулгалхо, цӀихеза охло цу тайпан наха дика тӀаэцарах. Йовлой тайпан боккхагӀбараша баркал аьлар Келаматанаькъан Махьмуд-Ӏаьланна, Гуцаранаькъан Микаила, гӀалгӀай гӀалаш тоаеш цар болх дӀахьош хиларах. Цар иштта белгалдир, гӀалгӀай этнокультуран тӀехьале лораяра накъадоалаш хиларал совгӀа, из гӀулакх къаман барт-цхьоагӀо чӀоагӀдеш хилар. Белгалдаккха дезаш да, гӀалгӀай къаман мах бола ганз - гӀалаш тоаяра балха говзал лакха йола гӀишлонхой бийха хилар. Келаматанаькъан Махьмуд-Ӏаьлас гулбеннарий теркам тӀаэзар, укхаза кхы кердача хӀамах пайда эцаш цахилара, Ӏохаьрца гӀалаш меттаоттаярга дӀадолхараш цун ший кхертӀой да, уж хьагулдаьд гӀишлонхоша шоаш, къаьнарча юртан доазон тӀара. Вай даьй кулгаша царех хӀара кхера бӀохабаь хилара истори кердадоалаш да. Царна бӀарахьежача дагадох, хӀара кхера хьокхаш, нийсбеш, ишттал чӀоагӀа а лакха а гӀала мишта хьалъеттай-хьогӀ вай даьша, аьле, уж бӀаьшерашка латташ хиларо цецвоаккх. Меттаоттаяьча гӀалаша шоай юххьанцара кеп хьаийцай. ХӀанз гӀишлонхой къахьегаш ба кораш, наӀараш тайп-тайпарча бӀехалах цӀендеш. ГӀишлонхой керттера декхар да, ма хулла чӀоагӀа а хьалхарча кепара а уж хилийтар. «Сафмар» яхача дикача гӀулакхий ганзо ахча деннадар дӀадахача шера Ний яхача юртара гӀалаш тоае. Келаматанаькъан Махьмуд-Ӏаьлас, Гуцаранаькъан Микаила теркам тӀабохийташ, хӀанз цигарча шоллагӀча даькъа болх йистебоалаш латт. Карарча хана, тоаяь яьннай тӀема йиъ гӀала, царех цаӀ ах тӀема гӀала я, 13 ахангахьа кхоачаш Ӏохаьрца гӀалаш, шиъ Даьла хьоахавеш хинна элгацаш, 14 маьлхара каш»,-аьлар «Сердало» газетага ГӀалгӀайчен кулгалхочун а паччахьалкхен а зарбан болх лелабераша. Гуцаранаькъан Микаила Ний яхача гӀалай юрта гулбеннарашта дийцар, паччахьалкхено тӀахьожам лоаттабеш, дикагӀа бола архитектуран пхьараш юкъеэза из болх дӀахьош хиларах. Санкт-Петербурга проекташ еча институто из план оттаяь хиларах тарра, даим тӀахьожам лоаттабу гӀалаш меттаоттаяра гӀулакха. Йовлой тайпан нахаца ше къамаьл деш, Гуцаранаькъан Микаила белгалдир, гӀалгӀай къаман дӀадахача бӀаьшерен гӀалаш, ЖӀайрахьа кхале мел яраш, ше тоае лаьрхӀа хилар. Из болх шоаш, Махьмуд-Ӏаьлаца дийна мел ба, цахаддаш хьабе безаш ба», - аьлар цо. Белгалдоаккх, «Сафмар» яхача дикача гӀулакхий ганза ахчах, ер шу йистедалалехь, Морч, Хьарп яха гӀалаш тоаяь яргхилар. Тахан лоаман ГӀалгӀайче вӀашагӀделла дика, кхоана вай тӀехьенна накъадаргда, из вай даьй тӀехьале я.