Цига дакъа лоацаш бар Россе а иштта царца Белоруссе, Таджикистана, Кыргызстана дешархой. Цар йоаржайир дунен тӀа эггара йоккхагӀа йола Коталон Байракх. Кавказе тӀом латташ, немций чугӀертача хана, из вохавеш, моастагӀчунгара котало яьккха 80 шу дузаш хилара хетаяь из моттиг дӀайолайир Волгограде. «Эшалургвоацар» яха халкъашта юкъера проект лаьрхӀа я, исторе оагӀонаш йиц ца яра, халкъашта юкъера гӀулакхаш чӀоагӀдара, из кхоачашъю Халкъашта юкъерча Ломоносовски клубо, къаман гӀулакха йолча Федеральни агентствос, Россе халкъа ЦӀено, Россе МИДа новкъостал а деш. Проект йистеяьнначул тӀехьагӀа, цунна юкъе дакъа лаьцараш гӀоргба шоай хьамсарча шахьарашка, мехка, цар дӀалургда истори лорадара дола дика гӀулакх кхычарга. Цар таро хургья шоай балхах дувца лоӀамхошца, цхьацца хӀама юкъедахьаш болча кагирхошца, шоай мехкарча Ӏаьдалца»,-аьлар «Сердало» газетага из проект вӀашагӀъеллараша. Хиннача СССРа мехкашка баха миллионаш нах вӀашкаоз Сийлахь-боккхача Даьймехка тӀемах болча дагалоацамо. Из вай юкъара турпала истори да, из цӀийца яздаьд, моастагӀчунгара котало йоаккхаш, латаш хиннача дукхача къамий викалаша. Укх деношка дӀахьош йола эггара йоккхагӀа йола Коталон Байракх Кавказа дезача лаьтта хьалкхоабаш я, Сийлахьча Коталон къона тӀехье. Цун шорал 33 метр я, йӀоахал 63 метр я. Цо дӀалоац 2079 кв метр.