«Массехк даькъах латташ болх бар тахан паччахьалкхен гойтама моттиге хьекхар. «Лоаме» аьнна цӀи тиллача проекте хьокха оттадир тахан, Наьсаре хьадаь, эггара хьалха дӀадахача бӀаьшере лоамашка кхелла кӀувсаш. ГӀалгӀай эггара хьалхарча юрта хьадаь кӀувсаш «Ангушт» яхача оагӀонца хьокха оттадир. Цу доккхача гӀулакхаца Дзараханаькъан Зейнап даькъалаювца венавар Мехкада Келаматанаькъан Махьмуд-Ӏаьла, культуран гӀулакхех йолча министерствонна хьалха латта Лаьнанаькъан Залина, иштта тайп-тайпарча моттигашкара хьакимаш, болхлой, гаргара нах, журналисташ.

«Сийг» яхача ансамбла доакъашхой бар цига, цӀай тоаде гӀерташ. Этнолог йолча Зейнапа 10 шера баь боккха болх бӀаргабайра гулбеннарашта. Цо белгалдечох, дӀадахача шера арахийцача «ГӀалгӀай гӀарчож.1924» яхача альбомо геттара айбир цун цу балхацара безам.

«Тахан цу Зейнапа беш бола болх бахьане, майрра ала йиш йолаш да вай; истинг яхар духхьал тха къаман говзал я, аьнна. Доккха баркал ала доагӀа цунна, иштта ший къам дезарах, ший наьха истори лоархӀаш, хьинаре къахьегаш вай культуран оагӀув тоабарах», - аьлар гулбеннарашка къамаьл деш культуран гӀулакхех йолча Министертсвон кулгалхочо.