«Ишколе даха кийчде бер» яха болам дӀаболабир мехка
18.08.2025 09:28
«Ишколе даха кийчде бер» яха болам ба мехка дӀахьош. Цун хьалхаэттар ва Паччахьалкхен Думан депутат вола Татренаькъан Муслим. Болам юкъебаьккхаб СВО доакъашхой, вахара хьал хала долча дезалашкарча берашта, иштта дегӀа могашал эшаеннарашта ишколе баха кийчо еш гӀо де.
Ӏаьлий-Юртарча зӀамигача дешархошта, эшаш мел болча кхоачамах дизза дола тӀормигаш делар. ХӀанз шоллагӀа шу да цу юртарча культуран цӀагӀа из болам дӀахьу. ДӀадахача шера 200 совгӀа волча дешархочоа гӀо дир цу беркатеча боламга гӀолла.
Цул совгӀа, из гӀулакх дӀахьочар сакъердаме программа кийчъяьяр берашта лаьрхӀа. Кхетаче гулбеннабар дешареи Ӏилмани гӀулакхех йолча министерствон болхлой, «ЦаӀ йола Росси» яхача парте доакъашхой.
