ГӀалгӀай метта итт ди дӀадоладеннад республике
Укх бетта 26-ча денга кхаччалца дӀахьоргда вай мехка гӀалгӀай меттахи литературахи дола итт ди. Тайп-тайпара наьна метта хетаяь кхетаченаш дӀакхухьаш, кхувш латтача тӀехьенна гӀалгӀай меттацара лерхӀам, безам совбоаккхаш дӀахьоргба из болх.
Колледжашка, ишколашка, берий бешамашка сочиненеш язъяр, классера сахьаташ, литературан сайренаш, гойтамаш дӀакхухьаргда.
«Мотт-къаман эггара чӀоагӀагӀа лорае еза ганз я! Ший мотт лорабе, из боаржабе, цун сий де декхарийла ва хӀара саг. Кхувш латтача тӀехьенга массахана дувца деза вай меттаца лелабе безача лерхӀамах, цун кӀоаргалах. Ишттача наькъаца мара лорабе аьттув баргбац вай наьна мотт. ХӀара фусаме хьеракӀиг санна боча болаш боахабе беза вайна Дала бенна къаман мотт», - дийцар «Сердало» газетага дешареи Ӏилмани гӀулакхах йолча министерствонна кулгал деча Боканаькъан Аьсета. Цу итт денна юкъе чулаьцараш, дӀадахьа лерхӀараш дукха да. ВӀаший пайда эца йиш йола йийлла урокаш дӀакхухьаш болх бергба хьехархоша.
ГӀалгӀай къаман йоазанхоша кхелла произведенеш ешаш, къаман сийдолча оамалех, Ӏадатех, лораде дезарех дувцаш, кхетаченаш дӀакхухьаргья республике. Къаман культураца дувзаденнараш лоархӀаш, дӀадаха деза вай дерригаш. Беза, бовза, сий де вай наьна метта!
