ГӏалгӀай мехка болх бе йолаелар керда ши радиостанци
«Радио шансон», «Радио дача» яха радиостанцеш чуйоагӀаш я KrutoyMedӀa медиахолдинга, уж я ший доалахьара хӀама хьадеш волча Гуцаранаькъан Микаила. Укх бетта радиостанцеша шоай болх дӀаболабир ГӏалгӀайче.
«Сердало» газетага ГӏалгӀай Республикан Кулгалхочун, Паччахьалкхен зарбан болх лелабераша яхачох, «Радио шансон» болх беш хургья 96,5 FM, хӀаьта «Радио дача»-92,2 FM.
Радио болх лаьрхӀа ба, моттигерча радиос лоацачул дукхагӀа нах чулацара. Цо таро лургья туризм дегӀайоалаяра, вай мохк дикагӀа бовзийтара, къаман культура, истори, кхоллам наха дӀадовзийта, республикал арахьарча нахага из кхачийта», - аьлар радиостанцей болх дӀаболабеш, ГӏалгӀайчен кулгалхочо Келаматанаькъан Махьмуд-Ӏаьлас.
Белгалдаккха деза, радиога ладувгӀаш хургба 850 эзар саг; царна юкъе, ГӏалгӀайчен бахархой санна, кхыча моттигашкара нах а хургба, из хьалоацалуш мел йолча шахьарашкара.
