ГӀалгӀай мехка дӀахьош я, республикерча къонача ашархой, иллиалархой яхь
ГӀалгӀай мехка дӀахьош я культуран Министерствос хьаллоацаш йола республикан къонача ашархой, иллиалархой яхь, цига я мехка искусствай берий ишколаш. Яхье дакъа лоацарий таро хургья тайп-тайпарча даькъошка шоашта ховш дар гойта, довзийта; уж да фортепиано, чӀондарг лакхар; фо чудетта инструменташ; халкъа инструменташ, вокал. Цо таро лургья къонача говзанчашта, шоай начӀал хьагойта тайп-тайпарча лостамашка.
Из яхь дӀахьош хилара бахьан да, тайп-тайпарча ашарий искусствай даькъошка берашта карагӀдоалар ма дарра довзар а цунах дӀахо пайда эцар а. Цу тайпара кхетаченаш дӀахьош хилча, дикагӀа карагӀдоал начӀал дола зӀамагӀа а доккхагӀа а бераш белгалде, уж эшача хьаллаца, ГӀалгӀайчен искусствай берий ишколай, ашарий ишколай таронаш йовза. ДукхагӀча даькъе яхь лаьрхӀа я, начӀал дол къонабараш хьаллацара; дешархошта, хьехархошта юкъе бувзам лелабара, иштта мехка культурни бувзам чӀоагӀбара», - аьлар «Сердало» газетага ГӀалгӀайчен культуран Министерствон зарбан болх лелабераша.
Республикан къонача ашархоша, иллиалархоша гӀадвуг шоай начӀал гойтарца хӀаравар, мехка яхье дакъа лоацаш хилча, цӀаккха а дицлургдоацаш, дег чу дус из ди.
