Нах ӏехабеш, мебель йохк яьхар лаьца воалл
05.03.2026 10:03
Гӏалгӏайчен Шолжа кхалерча полице зулам деш дола гӏулакх гучадаьккхар, яхаш, хоам бу «Сердало» газетага республикан МВД.
«Россе МВД «Сунженский» МО даькъ тӏарча полице, дехар дахьаш, ера моттигера кхалсаг, 2025 шера кӏимарса бетта 1-ча дийнахьа вахара бувзамашка йохкаш мебель я, аьнна, хоам корабаьбар цунна. Цу тӏагӏолла къамаьл деш, из мебель эца цо 18 эзар сом дӏадахьийтар йохкаш волчунна чота тӏа», - йоах хоамо.
Ахча дӏаийцачул тӏехьагӏа, мебель йохкаш хиннар кхы мичав ца ховш къайлаваьлар, из товар дохкаш хинна оагӏув а цо дӏаяьккхар хоамаца цхьана. Бакъда, цу тӏехьа къахьийгачул тӏехьагӏа полице болхлочун коравир из йохкаш хиннар, из лаьца воалл ше леладаьча цу тайпарча гӏулакхах. Цунна духьала уголовни гӏулакх хьадийллад.
