Россех дӏакхийтта 256 шу далар дездеш ба республике
Лоархӏамеча, вай массанена доккха долча Денца даькъалабийцар мехкахой республикан кулгалхочо Келаматанаькъан Махьмуд-ӏаьлас. «Сердалога» из хоам бера мехкадаь зарбан болх лелаберашкара.
«Хьамсара мехкахой!
Тахан вай республикан исторе лоархӏаме ди да. Россех дӏакхийтта 256 шу дизар дездеш да укх дийнахьа. Вай дерригача къаманна лоархӏаме, доккха дола ди да ер! Бӏаьшерашка денал, яхь, сий лорадеш; Даьхен гӏулакха мичча хана ураотта кийча долаш хьаденад гӏалгӏай къам. Тайп-тайпарча ханашка Россе хӏама лорадара тӏехьа белгала болаш, турпалал гойташ лаьттаб гӏалгӏай. Царна юкъерча дуккхабарий цӏераш Россе исторе яхь йолча къонгий цӏераш хинна яха йисай», - белгалду Мехкадас ший къамаьла юкъе.
Мехка кулгалхочо теркалдир, вай мохк хӏара денна тоалуш латтилга. Тайп-тайпара гӏишлош хьалъеш, наькъаш тоадеш, экономикан хьал меттаоттадеш боккха болх ба мехка дӏахьошбар. Бахархошта паргӏато хилийтара тӏехьа, къаьстта кагирхошта шоаш бахача моттиге хьаде хӏама хургдолаш, деша аьттув хургболаш къахьег тахан.
«Дуккхача къамех латтача Россе оагӏув ба тахан Гӏалгӏайче. Къамаш шоайла барт, бувзам болаш; вӏаший культура, ӏадаташ лоархӏаш, цхьанкхеташ хиларо Россех низ бола паччахьалкхе ю. Хӏаьта тахан-м геттара лоархӏаме да из ер шу Россе Президента Путин Владимира Россе къамий цхьоагӏон Шу да, аьнна, соцам баь ма хиллара. Истори, беркате ӏадаташ лорадеш, Гӏалгӏӏай къаман, иштта берригача мехка хӏама тоадара тӏехьа хьинаре къахьега дезаш да вай дерригаш», - аьлар Келаматанаькъан Махьмуд-ӏаьлас. Иразе, аьттонца, беркатаца, вӏӏаший барт, безам болаш баха даькъалабийцар Мехкадас республикан бахархой!
