СССР Турпалхочунна Эмиров Валентина сийленг оттадир
Советски Союза Турпал, лётчик хиннача Эмиров Валентина оттадаь сийленг хьаделлаш, кхетаче хилар Дабе-Юртарча Къилбаседа-Кавказа доагора-энергетически колледже. Цига дакъа лоацаш вар вай мехкада Келаматанаькъан Махьмуд-Ӏаьла, Селий мехкара кулгалхо Меликов Сергей.
Даьхе лораеш лаьттача турпала хетадаь сийленг оттадар Россе герзашцарча низех йолча Министерствон программага гӀолла кхоачашдир. 2023-ча шера болабеннабар из болх. Сийленг къаьстта цу доазон тӀа оттадара бахьан Эмиров Валентин Дабе-Юртара МТС хиннача моттиге кхелха хиларца дувзаденна да. Чуранаькъан Т. цӀи лелаеш йола колледж тахан цу моттиге я.
«Советски Союза Турпалхочун истори вай ши мохк вӀашкаозаш да. МагӀалбика кхалерча Дабе-Юрта чӀоагӀдир цун тӀема истори. 1942-ча шера тов бетта сигала моастагӀчунна духьала дов деш, вахар хаьдар Эмиров Валентина», - белгалдир вай мехкадас.
Меликов Сергейс гулбеннарашта дийцар турпала тӀема наькъах. «Даьхенцара безам боккха болаш, шоай синош ца кходеш, лаьтта турпалаш ба уж. Кхерам яхача дешага шоаш юха ца тохийташ, моастагӀа вай лаьтташкара эккхавеш, доккха денал гойташ духьаллаьттаб вай къонгаш. ТӀехьено тӀехьенга телаш, бӀаьшерашка дахаргдола доккха истори да из», - аьлар Селий мехкарча кулгалхочо.
Из лоархӀаме кхетаче дӀахьоча баьхка бар Ӏаьдала болхлой, «МагӀалбик» яхача тӀема ханашка дайнараш хьалехача тоабан доакъашхой, «Къона эскархой» яхача оагӀонца къахьегараш, иштта Эмиров Валентина юртхо вола Россе Турпал Набиев Энвер.
