Къамашта юкъера йоккха Ӏилман кхетаче дӀахьоргья республике укх бетта
«Россера къаман-паччахьалкхен хувцамаш: истори, таханара ха» яха йоккха Къаман Ӏилман кхетаче дӀахьоргья вай мехка укх бетта 23-ча дийнахьа. ГӀалгӀай паччахьалкхен 100 шу дизара хетабаь ба из болх. Цу гӀулакхах шийна хетар оалаш, йистхилар цу моттига доакъашхошка А. М. Горьке цӀерах йолча Россе Ӏилман академе дунен литературах йолча института директор, профессор, филологически Ӏилмай доктор вола Полонский Вадим.
«Россе, кхыча мехкашкара Ӏилманхой чулоацаш йола кхетаче, тахан латтача хана, чӀоагӀа лоархӀаме я. Дувца оттадаь дешаш дукха да. РФ лоархӀамеча декхарех, Кавказе дахача къамай исторех, таханарча вахарах; боккха тӀом латтача хана, гӀалгӀай къаман къонгаша дакъа лацарах; эрсий метта таханарча хьалах, иштта дуккхача кхыдолча лоархӀамедарех дувцаргда кхетаче», - белгалдир цӀихезача Ӏилманхочо. Полонский Вадима иштта теркалдир, конференце программанна юкъе дувца оттадаьраша дукхача хана денз хьабоагӀа тайп-тайпарча наха юкъера бувзам, культуран оагӀонцара хьал чӀоагӀдергхилар.
