ЦӀи ялара духьалара болх дӀахьу хьунашка
ХьатӀайоагӀаш йӀовхал отта ха хилар теркаме а лоацаш, ГӀалгӀайчен хьунашка болх дӀахьош ба, цӀера духьала къовсам лоаттабара дола хьал тоадеш, хьалхарча аргӀагӀа уж да минералаш теха дола оасаш хьакхоллар, лаьрххӀа йола техника оарцагӀа а яьккха.
ГӀалгӀай Республикан Ӏалама Министерствос беча хоамах, цу тайпара оасаш дахийтача таро хул цӀерах хьун доакъош кӀалхардаха, тӀаккха цӀи дӀа-юха яржаргьяц.
«Керда оасаш хьакхолларал совгӀа, минералаш теха оасаш 5 км кхаччалца цӀендеш болх дӀабихьаб. Иштта нахага хоам беш дола диъ улг оттадаьд.
Юкъера хьаийцача, таханарча денга кхоачаш республикан хьунашка цӀи ялара духьала лаьрхӀа хинна балхаш ахаш даь даьннад», - аьлар ГӀалгӀайчен Ӏалама Министерстве.
Белгалду, уж деррига балхаш дӀахьош да «Хьунаш лораяр» яхача паччахьалкхен программанна, «Экологически дика таронаш» яхача къаман проекта чудоагӀаш.
