«Болхлой» яхача къаман проектага гӀолла, болх дӀахьош ба мехка
Моттигерча экономикан гӀулакхе эшаш бола говзанчаш кийчбара тӀехьа йола «Болхлой» яха къаман проект я, мехка йоаржаеш. Из хоам бу «Сердалога» Мехкадаь, Паччахьалкхен зарбан болх лелабераша.
Проекта юкъерча программашка гӀолла деша, цхьацца хӀама Ӏомаде аьттув лургба бахархошта: пенсе баха ха ярашта, ворхӀ шерга кхачанза бераш долча ноаношта, заӀапхошта, тӀема операцешкарча ветеранашта, болх боацаш дӀаязбаь латтарашта.
Иштта къаман проекта декхараш кхоачашдара тӀехьа бувзам чӀоагӀбаьб РАНХиГСаца, Томскерча паччахьалкхен университетаца, профессиональни дешар доаржадарах йолча институтаца.
Цу проекта юкъедолх къахьегама моттигий хьал тоадар, бокъо йоацача тайпара къахьегарашта духьала болх дӀабахьар, иштта кхыдараш а. Вай мехкадас Келаматанаькъан Махьмуд-Ӏаьлас белгалдир; цу оагӀонцара хӀама тоадара тӀехьа кулгалхоша боккха болх дӀахьоргба, аьнна. ТӀехьа тӀайоагӀача хана, мехкарча экономикан оагӀонца лакха говзал йола болхлой хулийтаргба цу гӀулакхо, иштта хьабе болх цахилар а лохдергда.
«Къаьстта терко ергья ветеранашта, дукха бераш дарашта. Дог тийша ва со, федеральни оагӀонца цхьана дӀахьош болча балхо вай мехка хӀама дикка тоадергхиларах», - тӀатехар вай Мехкадас.
