ГӏалгӀай мехка хьалкхебу бехктокхаме нах
Инаркъе дешархошца дӀайихьар терроризма духьала хьехама болх бу лаьрххӀа йола кхетаче. ЛоархӀаме дешаш дувцача дакъа лоацаш хилар МагӀалбика кхален администраце АТК даькъа кулгалхо Джамболатанаькъан Мухьмад, цун гӀонча Цӏечой Руслан, иштта дина викал Йовлой Хьажмурд. Дувца оттадаь керттера хаттар дар терроризма, экстремизма хьал кагирхошта юкъе цадаржийтар. Хьаьшаша дешархошца дийцар хоадам болаш лоархӀаме долдга дина-эздела оагӀув лелаяр.
Доакъашхошта хьалхадаьккхар Российски Федераце закона боарам хилар, цун духьалара гӀулакхаш леладераш бехктокхаме озаш болга, иштта белгалдир Интернетага гӀолла хоамаш доаржадара духьала хила везилга.
Йовлой Хьажмурда белгалдир; Ӏадатий, дин мах бараш леладаро; шоай истори, культура йовзаро, боккхагӀбараш лоархӀаш хиларо саг тешшаме харцача наькъ тӀа варгвоацаш лоравергхиларах. Цӏена дин леладеш волча сага харц хӀама де йиш яц, е из нийса боацача наькъ тӀа а варгвац, яхаш, дийцар цо.
«Кагирхоша шоай хургдар хьакхолла деза цӀена, чӀоагӀа вахара лард йоллаш, къахьегама тӀера болаш, нахаца лерхӀам болаш», - аьлар «Сердало» газетага МагӀалбика кхален администраце зарбан болх лелабераша.
Кхетаче дӀайихьар, шоайла къамаьл деча, дагабоалача хьисапе. Дешархоша шоашта хьалхашка нийслуш дола хаттараш лора, царна говзанчаша лоархӀаме, хоадам болаш жоп лора.
Кхален администраце викалаша белгалду, цу тайпара кхетаченаш каст-каста еш хилар. Уж накъайоал кхерамзле хьакхоллача, кагирхошта нийса кхетам луча даькъ тӀа.
