16 шу даьнна кӏаьнк эттӏавеш, лораша дӏаяьккхар сага дегӏаца хила йиш йоаца хӏама
Мерий дукъ кагдаь ӏочувоалаваьча 16 шу даьннача кӏаьнка операци еш баьхкача ДРКБ лорашта, тамашийна хӏама хоаелар. «Сердалога» из хоам бир мехкарча цу оагӏонцарча министерствос.
«Унахо эттӏавеш баьхкача хирургашта кӏаьнка мерий чу, ринолит оала кхера хинна, чӏоагӏъенна хӏама корайир. Цхьан тайпара мерий чу нийсъеннача цу хӏаманна гонахьа кальце тух хьаӏайна, кхера хинна яьллай из», - йоах тхогарча хоамо. Лораша белгалдечох, из хӏама мерий чу нийсъенна дикка шераш хиннад.
Цу гӏулакхо хьагойт, даьша, ноаноша берашта зӏамига хӏамилгаш юкъейола ловзаргаш ийде йиш йоацилга, царех моллагӏчох зулам хьахила йиш йолга. Нагахьа бер меражах хала садоахаш дале, е кхыдола кхоачамбоацараш зийнадале, ӏалаьмате сиха дига беза лорашка.
«Бера лакха тӏахьожам, терко лоаттаяр, хан-ханнахьа лорашта тӏадигар лоархӏаме декхар да», - аьлар лорий министерстве.
