«ЛаьрххӀа дола цӀай дездеш, вай тахан баркал оал берригача бӀухошта, царна новкъостал деш хиннарашта. Цар къахьегамца Советски Союзо Сийлахь-боккхача Даьймехка тӀем тӀа котало яьккхар. Маьтсела бетта ийслагӀа ди-къаьстта дола цӀай да ГӀалгӀайченна, вай къам дика дакъа лоацаш хиннад цу тӀем тӀа. Байнарий сийна дакъа лоацаш хилар ерригача паччахьалкхен боахамий, урхаллений викалаш. Гулбеннарашта хьалхашка къамаьл деш, мехка кулгалхочо Келаматанаькъан Махьмуд-Ӏаьланна дагаухар цу тӀем тӀа моастагӀчох латаш майрал, денал гойтараш, хьалхарча мугӀарашка тахан а латта бӀухой», - аьлар тхоца къамаьл даьчо.

«Тахан вайна дагаух Брестски крепость, Сталинград, кхыдола Даьхен доазонаш лорадеш лаьттараш. Вай дай Берлине кхаьчар, шоай садехка моастагӀчох латаш. Эзараш ГӀалгӀайчен къонгаш, шеко йоацаш, кийча хилар тӀем тӀа баха, моастагӀа эшаве, уж бар тешаме бола Даьхен къонгаш.

Цхьабараш байра, цхьабараш мичаб ца ховш бисар, бакъда вайна дика ховш да уж бизза турпалхой болга.

Карарча хана а вай мехкахой лаьрххӀа йолча операцен мугӀарашка ба, вӀалла шеко йоацаш, нийсхон тӀехьа котало яккха латаш, Россе лоархӀаме доазонаш лорадеш.

Вахар – из сага эггара дезагӀдар да. Сийлахь-боккхача Даьймехка тӀем тӀа шоай синош Ӏодехкаш, нийсхон тӀехьа латаш хилар ветеранаш.

Коталон ди массахана хиннад лоархӀамегӀа дола цӀай. Из Россе бахархой дегашка дусаргда даим. Вайх хӀаравар, ший дешарца, къахьегамца декхарийла ва Даьхен дикагӀа вола воӀ, йоӀ хила», - аьлар ГӀалгӀай Республикан кулгалхочо Келаматанаькъан Махьмуд-Ӏаьлас.