Бойла дисача берашта фусамаш ялара декхараш кхоачашдаьд ГӀалгӀай мехко
ДӀадодача шера бойла диса бераш фусамашца Ӏалашдара декхараш кхоачашдаьд ГӀалгӀай мехко – республикан 24 вахархочо кастта хьаэцаргда шоай доалахьарча моттигий дӀоагӀаш. Хила безача боарамга хьежжа цунга дӀадодаш дола ахча хьахьоажадаьдар федеральни Ӏаьдало, из дар 38,164 миллион сом. Амма мехкадас Келаматанаькъан Махьмуд-Ӏаьлас белгалдаьккхар, из ахча деррига хьашташ кхоачашде тоъаш цахилар. Цо яхачох, республике хьалъеш яц зӀамига гӀишлош, хӀаьта квартирий маьхаш тӀехь-тӀехьагӀа айлуш латт. Хьалхашка латта декхараш кхоачашдар духьа, 2022-ча шера денз, республико кхы тӀа ахча хьежаду цу гӀулакха. Хьалхарча шин шера 20, 25 миллион сом хьожадир, укх шера – 24 млн сом.
«Оаха дизза кхоачашдаьд укх шерара боайла дисача а даь-наьна Ӏунал доацача а берашта даха моттигаш Ӏалашъяра декхар. Таханарча дийнахьа эшаш мел йолча гӀишлонца ювзаенна паччахьалкхен контракташ оттаяьй, царех боагӀаш бола бизза мах дӀабеннаб», - яхаш, мехка кулгалхочун дешаш доаладу цун зарбан болх лелабераша.
Белгалдаккха деза, 2023 шера эца езаш хиннача 15 фусамах 13 ийца хиннилга. Вож шиъ ца эцаш йисаяр, царга хьожаш йолча комиссе уж кхоачам болаш, законо дӀадеххача тайпара дика цахилар белгалдаккхар бахьан долаш. 2024 шера уж квартираш эца аьнна 3,4 млн сом хьожадаьд Мехкадас, ГӀалгӀай республикан гӀонна йолча ганзера.
