Эса-ЧӀожерча дарбан баьций книжка арадоаккхаргда
15.07.2025 11:33
ГӏалгӀайче арадоалаш да Эса-ЧӀожен дарбан баьцаш тӀайола сборник, из накъадаргда хьалхагӀа наха деш хинна дарбаш леладерашта. Цу тӀара го йиш хургья малагӀа баьцаш пайда луш я а, мишта уж кийчъе еза а.
«Пхьуй баьццара аптека» яха книжка арадаргда 500 экземпляр йолаш. Цун автор, фитотерапевт Селентай Русалина я, ши шу совгӀа ха я цо Эса-ЧӀожера баьцаш йовзара дола балхаш дӀахьу, даим Лохерча Пхьуй гӀалай комплекса гонахьара Ӏалам тохкаш.
Цул совгӀа, книжка тӀа лаьрххӀа йола оагӀонаш хургья рецепташ тӀадолаш, иштта тайп-тайпарча лазарашта дарбаш дарах дола хьехамаш хургда цу тӀа.
Из йоазув хьакхеллад «Тӏехьале» яхача гӀишлонхой-меттаоттаяра ишкола говзанчий новкъосталца.
