ГӀалгӀай мехко баркал аьлар казахашта, мехкахдаьккха къам цар тӀаэцарах
Казахстана, Кокчетавски областа «Вайнах» яхача Нохч-ГӀалгӀайчен этнокультура юкъарлоно дагалоаттама кхетаче дӀайихьар Кокшетау-Шахьара доттагӀала цӀагӀа. Из хетаяь яр Сталина гӀалгӀай, нохчий къамаш мехкахдаьха 80 шу дузаш хилара, яхаш дийцар «Сердало» газетага ГӀалгӀайчен арахьарча бувзамий, къаман политикан, зарбан, хоамий министерстве.
«Вайнах» юкъарлонна кулгалхочо Янданаькъан Гирихана хьалхадаьккхар цу къизала истори, гӀалгӀайи нохчийи барт хилар, беха ца хьовзаш, уж цу халонех чакхбалар.
Кхетачен доакъашхоех хьакхийтар ГӀалгӀайчен Ӏоахарганаькъан Ч. Э. цӀерагӀча гуманитарни Ӏилмай Ӏилма-тохкама института кулгалхочун гӀонча, исторически Ӏилмай доктор Дзараханаькъан Зейнап. Ше къамаьл деш, цо белгалдир къам мехкахдоаккхаш гӀалгӀашта, нохчашта мел йоккхий халонаш нийсъелар. ГӀалгӀайчен цӀихезача культуран болхлочо Эккажанаькъан Маринас кхетачен доакъашхошка моаршал делар, иштта казахий къаманна баркал аьлар массаболча гӀалгӀай цӀерах», - хоам бир тхога.
Сталина бӀарчча къамаш мехкахдаьхача хана, дийца ца валлал доккха гӀулакх гойтар, хьамсара мохк бита, гаьнарча кхыча мехка кхаьчача нахá. Деррига дита, хьаийца хӀама доацаш, гаьнарча Сибре, Казахстане Ӏобигача наха из доккха гӀо дар, цох кӀалхар а баьлар уж. ХӀанз а 80 шу даьнначул тӀехьагӀа, хӀара гӀалгӀай, нохчий цӀагӀа дагайоагӀа уж ханаш.
