Ачалкх яха хий бӏехдераш малашб тохкаш хилар мехка
ӏалама гӏулакхех йолча министерствога Йоккхача Ачалкхерча бахархошкара хоам бера, цу юрта гӏолла дода хий бӏехденнад, аьнна. Из хоам «Сердалога» бир министерствон болхлоша.
Бахархоша яхачох, хий хьадоаккхаш, дӏа-хьа дохьийташ йолча моттиго фуй ца хов хӏамаш ӏочуухийт хи чу, цул совгӏа, наьха цӏеношта юхерча доазон тӏа из завод хиларо сатем боабаь бар уж.
«Министерствонна кулгал деча Мизенаькъан Микаила тӏадилла, хин хьал малагӏча боарам тӏа латт хьажа арабаьлар цу оагӏонцара болхлой. Хи чу хӏамаш ӏочуухийташ турба йиллалга бакъдолаш хилар, цул совгӏа, из моттиг а цхьан сага доалахьа я.
Заводе дӏачуводаш йола наӏараш къайла латт, чувала аьттув боацаш, цу моттига доал деча сагах а хӏама дац министерстве ховш», - йоах тхога бенача хоамо. ӏаьдала болхлоша оттаяьча протоколага гӏолла бехктокхаме озаргба хий бӏехдераш.
Мехкарча МВД, Прокуратуре, Роспотребнадзоре из хьал довзийташ хоам баьб. Министерствос дӏахо тӏахьожам бергба цу балха.
