Юртбоахама гIулакхех йолча Министерствонна тIадиллад вай Мехкадас, цо ший болх юха дIаболабергболаш гIо де, аьнна. Масала, хьайбай фермашта лаьрхIа лаьттан доазув къоастаде деза. Тахан лерхIачох, 100 совгIа бежан хургда ферме. Хьайбай маша хьадеча завода шура лоаттаергья цар. Лаьттан дакъа къоастадара дош дукха ца говш дувца лерхI паччахьалкхен комиссе доакъашхоша.

«Хьайбай маша лоаттадеш йола завод вай республике тахан геттара эшаш я. Бахархошта унахцIена, беркате кхача лоаттабе беза вай, юртбоахама хьал тоадергдола болх дIабахьа беза. Наха болх бе моттигаш хургья; цул совгIа, вахача моттиге арахецаш цIена кхача хургба», - белгалдир вай Мехкадас. Республикан кулгалхочо дийцар, юртбоахаме къахьега лакха говзал йола болхлой цахиларах, из бахьан долаш кхыча моттигашкара нах беха безаш хул вайцига къахьега. Келаматанаькъан Махьмуд-Iаьлас аьлар, юртбоахаме къахьега эшаш бола говзанчаш колледжаша кийчбеш ца хуле, цу дешара моттигий лицензеш дIайохаргья, аьнна.