«Автоматизированни йоал яккхара даькъ тӀа болх бар» яха законопроект хьалхагӀа хьаллаьцаяр Халкъа Гуллама депутаташа, хӀанз цунна кулг яздаьд ГӏалгӀайчен Кулгалхочо. Цун керттера бахьан да бизнес дӀахьош аттагӀа хилар, доалахьара хӀама хьадечар шоай балха отчёт кийчъяр а аттача даккхар. Цул совгӀа, кердача йоал яккхара гӀулакхо новкъостал дергда къахьегама хьалаш, алапеш законах хилийта а, иштта пенсеш а йоалах доагӀаш дар а вӀашагӀтоха.

«Белгалдаккха лов, тхо лаьрхӀа дац тӀатеӀӀа бизнес лелаярах йоал яккха. Тхо гӀерт массане а цу юкъе дакъа лоацаш волча сага хьашташ цхьатарра хилийта. Доалахьара хӀама хьадечарна бизнес дӀаяхьа дика хьалаш вӀашагӀдехкад: шин процентага кхоачаш йоал лаьгӀъяьй, юкъеяьхай кредит далара банкаш», - аьлар цох дувцаш ГӏалгӀайчен Кулгалхочо Келаматанаькъан Махьмуд-Ӏаьлас.

Цул совгӀа, мехка кулгалхочо белгалдир, из законопроект тӀаэцарах зе хургдац республикан бюджета. Из дикагӀа тӀахьожам болаш хургда доалахьара хӀама дерий балха.

Цул совгӀа, гуш хургда цо дӀахо малагӀа таронаш лу а, предпринимателашта юкъе из мел эшаш да а, цун экономически Ӏаткъаш хилара оагӀонаш а белгалъяргья, из мел пайдана да а гуш хургда.