Хица нийсденна 3,8 эзар хатар дӏадерзадеш, болх бир укх тӏехьарча кхаь шера
2023-ча шера маьцхали бетта денз, 3,8 эзар совгӏа хица нийсденна хатараш юстардоахаш болх бир мехка. «Сердалога» из хоам бера мехкадаь зарбан болх лелаберашкара.
«Хин оагӏонцарча балхах «Цаӏ вола оператор» яха ГУП вӏашагӏаеллачул тӏехьагӏа, дӏахьош латташ болх ба из. 2023-ча шера маьцхали бетта 1-ча дийнахьа дӏаболабаьб из болх. Цаӏ вола оператор хьакхолларо хин оагӏонцара гӏулакхаш дикка меттадоаладаьд, хатараш хинна моттигаш а дикагӏа йовз», - белгалдир вай мехкадас Келаматанаькъан Махьмуд-ӏаьлас. Мехкарча хӏара юрта, шахьаре цу оагӏонцара болх дӏахьош хьабоагӏа тахан.
Ди-бийса ца къовсаш, хатар хиннача дӏаболхаш къахьег. Дукха рузкъа да вай мехка цу гӏулакха къоастадаьр. 2026-ча шера 301,7 млн сом ахча да хьахьожадаьр. Цул совгӏа, 2023-ча шерарча ардара беттагара 2025-ча шерга кхаччалца федеральни ганзагара 1, 304 млрд рузкъак хьахьожадаьд мехкарча тарифни хувцамех субсидеш дала лаьрхӏа.
Вай Мехкадас теркалдир, Цаӏ вола оператор хиларо коммунальни оагӏонцара болх дикка тоабаьлга. Хин моттигашкара хьал боаггӏача боараме меттадоаладеш, къахьега лерхӏ мехка.
