Гӏалгӏай мехка ах шера дӏайихьай 90 спортивни кхетаче
Хьалхарча ах шера, 90 совгӏа спортивни кхетаче дӏайихьай Гӏалгӏай мехка тайп-тайпарча боарам тӏа - моттигерча а халкъашта юкъерча а. Цига дакъа лаьцад 4 эзар совгӏа спортсмена, яхаш, дийцар Гӏалгӏай республикан Кулгалхочун, Паччахьалкхен зарбан болх лелабераша.
Чӏоагӏагӏа дагахьа йиса хиннарех яр ала лов сона, тӏема искусствох йола Хьалхара фестиваль; эллиний-румий латарах йола Россе Хьалхале, из хетаяь яр Россе турпалхочунна Келаматанаькъан Ӏалихана; дзюдох йола Ерригроссийски яхьаш, уж хетаяь хилар Пхьарчанаькъан Мухьмада; вӏаший ийнача латара NFL 3 халкъашта юкъера яхь.
Гӏалгӏайчен спортсменаша цу юкъа 180 майдилг яьккхар. Цул совгӏа 11 атлета елар «Спорта мастер» яха цӏи, хӏаьта 167 сагах «Спорта мастералла кандидат» хилар.
«Спорт дегӏайоалаяр - тха балха лоархӏамеча оагӏонах цаӏ я. Тхо гӏерт республикан бахархой вахаре из дукхагӏа хилийта», - аьлар Гӏалгӏайчен кулгалхочо Келаматанаькъан Махьмуд-Ӏаьлас, даьха толамаш белгалдеш.
Кастлуш Гӏалгӏайчено тӏаэцаргья Ерригроссийски ГТО комплекса хетаяь фестиваль, из ювзаенна я Сийлахь-боккхача Даьймехка тӏем тӏа Котало яьккха 80 шу дизарца. Тов бетта 9-ча денгара 15-ча денга кхаччалца, республике хургья Россе тайп-тайпарча миӏингашкара, иштта кхыча мехкашкара 43 тоаба.
