Гӏаьлений кӏинга чу героин лочкъаяь хиннар дӏалаьцар ӏаьдало
Героин яха «дохьаж» чудоалла 38 гурмат каракхаьчар Илдарха-Гӏалий тӏарча полице болхлошта. Из хоам «Сердалога» бир МВД.
«Мехкарча моттигашка боккхача боарамах героин яха наркотик йоаржаеш ва, аьнна, хоавенна вахархо дӏалаьцар МВД наркотикашта духьале лоаттаеча оагӏон Илдарха-Гӏалий тӏарча Россе ОМВД болхлоша, мехкарча МВД кинологически оагӏон болхлошца цхьана Илдарха-Гӏалий тӏара Кирова, Осканаькъан цӏерах дола урамаш вӏашкаоттача моттиге», - йоах тхога бенача хоамо.
Ше дӏалоацача хана, «Тойота» яхача машина чура гӏаьленаш чухинна кӏопилг аракхессай цо. Цу чура кӏай хӏама чуйоалла 38 гурмат корайир полице болхлошта. Дӏабихьача тохкама балхо хьагойтар из 14,37 грамм героин йолга. Зуламхочоа духьала гӏулакх хьадийлла болх дӏахохьош да ӏаьдал.
