Низ бара, терроризм яхача зулама духьала болх бу мехка
Кердача Редантерча культуран цӀагӀа дӀайихьача кхетаче, дийцар низ барах, терроризм яхача зуламах. Кхувш латтарашта цу воча гӀулакхех мишта лорабала беза ховргдолаш, дӀахьош яр кхетаче.
«Терроризм тахан эггара доккхагӀа, бӀехагӀа дола во да дунен тӀа. Цхьаккха бехк боацача наьха вахар хоададарал совгӀа, адама юкъе кхерам боаржабеш, хӀама кегадеш дола во да из. Кхетаче дийцар цунна духьала къовсам лоаттабарах, хӀара саг цу доккхача зулама гаьна хилар мел лоархӀаме да», - яхаш, хоам бу «Сердалога» культуран цӀен кулгал деча Хоаной Марета.
Геттара доаржадеш дийцар берашта царца дувзаденнарех. Кхетаче дӀахьош хиннача Мамилганаькъан Маргаритас дунен тӀа цу бӀехача наха доаржадаьча хатарех, цу юкъе вахар хаьдарех, лозабаьрех дийцар берашта. Иштта берашта хьалхадаьккхар, фуй ца ховш йола хӀама, цхьа тешаме ца хета тӀормиг зийча, Ӏалаьмате чехка боккхийчарга, Ӏаьдалга хоам бе безилга, цу юхе дӀатӀааха йиш йоацилга.
Иштта йолча кхетаченаша берашта юкъе боккха пайда боаржабу, цу оагӀонцара кхетам лакхбу. Вай дерригаш цхьана долаш, лораде дезаш хӀамаш да уж, массахана хьалхадаха деза вай кхувш латтача тӀехьенна интернета оагӀонашка гӀолла из зулам доаржадерех лорабала безилга, моллагӀа цу тайпара хӀама зийча Ӏаьдалга дӀаала дезилга, шоаш Ӏехабайта, тувлбайта йиш йоацилга.
