Гӏалгӏай мехка болх бе доладелар керда медиацхьанкхетар
Гӏалгӏайче лаьрххӏа болх бе доладелар керда медиацхьанкхетар, из хьакхеллад «Гӏалгӏайче» яхача юкъара-политически газета даькъ тӏа. Цу проекта чудоагӏаш да кепа тохар а иштта онлайн-кепа тохар а, уж лаьрхӏа да хоамаш сиха лоаттадара.
Цу цхьанкхетарах (холдингах) иштта дӏакхийтар «Ангушт» яха медиатоаба, цо лоаттаду керда хоамаш, иштта укх заман радиостуди. Из студи я республикан бахархошца, юкъара болх берашца, эксперташца къамаьл ду майда.
«Тахан лоархӏаме да, духхьал хоам баь а ца ӏеш, ма дарра хьал гойташ дола сурт вӏашагӏдоллар. Вай дахаш йола ха я, сиха хила дезаш, хӏама кӏоаргга тахкарца дувзалуш хила дезаш, иштта хӏарман хьалхашка бехктокхаме хила дезаш»,- аьлар медиацхьанкхетар хьаделларах лаьца Гӏалгӏайчен кулгалхочо Келаматанаькъан Махьмуд-ӏаьлас. Цо тӏатехар, кердача моттиго эша ӏалашо ергья, Гӏалгӏайчен бахархошка нийса а тайп-тайпарча боараме а хоамаш дӏакхоачийташ.
Медиацхьанкхетара кулгалхочо, керттерча редактора Хамхой Рашида белгалдир, керда балха оагӏув - из духхьал майда хинна ӏац, из боккъонца йола мультимедийни экочоалх я.
«Медиацхьанкхетар хьакхоллар - из да майдаш хьакхолларгара лелаеш йолча экосиситемага воалаш хилар. Цунна чудоагӏа керттера кхо декхар: дӏалуш бола хоам дикал йолаш, сиха арабоалаш, тохкам беш хилар. Оаха редакце балха гӏирс арахецаш бувзам лоаттабу сайта, кепа тохара, радио оагӏонашта юкъе»,- аьлар цо шоай балхах лаьца.
