Дагалоаттама цӀерах, cийг кхоачаргба вай мехкага
«Дагалоаттама цӀи» яха болам ба Коталон ди хьатӀадоагӀаш Къаман фронтои Росбувзамои дӀахьош. Болама керттера декхар - боккхача тӀема турпалхой дагалацар, даиман йоагаш йолча цӀерах дакъа дунен тайп-тайпарча миӀингашка дӀа-хьа кхачийтар. Къаман фронта доакъашхоша, цӀихезача культуран, спорта, журналистикан болхлоша Москверча Александровски бешара, малав ца ховча салтечун боарза тӀарча цӀерах дакъа хьаийца, дунен дуккхача моттигашка дӀахьоргда. ЦӀера ала чубола лампаш моттигашкарча музейшка, библиотекашка, дешара моттигашка, фашизманна духьале лоаттаеча оагӀонашка дӀаекъаргья цар. Иштта лампа вай МагӀалбике а кхоачаргья.
«Из проект эшаш я тӀема истори массахана дагалоаттаде, лирача тӀема доакъашхой цӀераш йиц ца ялийта, тайп-тайпарча къамашта, мехкашта юкъе из ди массахана дагалоаттадара тӀагӀолла бувзам хилийта. Даиман йоагача цӀера сийг кхоачаргба дунен 14 мехка, Россен 40 миӀинге, вай республика юкъе йолаш. Цу дийнача цӀера ало дагабохийт вайна бирсача, боккхача тӀема юкъе моастагӀа вохавеш, вай лаьтташ царна кара ца кхоачийташ лаьттараш, шоай синош тӀема аренашка Ӏодийхкараш», - дийцар «Сердалога» Къаман фронта комитета хьалхалаттача Тенканаькъан Башира.
«Дагалоаттама цӀи» яхача боламо вӀашкаоз фашизма, къамаш къестадара духьале лоаттаераш, машаре вахар дезараш.
