Республике кхаьчад, «Вай нах» яха керда журнал
16.10.2023 23:40
Кепа теха арадаьннад «Вай нах» яха керда журнал. Из хетадаьд, гӀалгӀай халкъа паччахьалкхен 100 дузаш хилара. Цо вайх хӀаранена дагадохийт дӀадаха вай истори. ГӀалгӀай массаза а хиннаб, шоай лаьтта гӀишлош еш, лаьтта оахаш бахара тӀера, бакъда тӀеххьарча хана эттача атта доацача къаман балаша, ма хетта баха битабац уж. Атта дац таханара ди а, кердача халонашта духьалъотта везаш хиларах, бакъда из вахара никъ лерттӀа дӀабахьа безаш да вай. Цо вайна хьалхашка оттаду керда декхараш, вайх тийша да из никъ лорабар.
«Дукха да культурах, кхетамах, дешарах, спорта даькъ тӀа карагӀдаьннарех дувца, бакъда керттердар – экономика. Экономически лард еллаеце, пайдана хургьяц цхьаккха юкъарло а вахар а, моллагӀа дӀадоладаь хӀама. Цудухьа журнал арахецар дувзаденна да республикан экономически хургдолчунца. «Вай наьха» Ӏадатех дац даьссача къамаьлашца дешаш бараш кӀаьдбар, статистика отчеташ царна ешар. Оаха массаза кхыдар леладу - кхыча республикашта тара доацар, гӀалгӀай Ӏадатех мара доацаш долча вахарах, таронех дувцар. Уж карагӀдоал гӀалгӀай Ӏадаташца кхебаьча наха, эздел леладерашта (язъяь йоаца вахара бокъонаш). Наьна шурийца цӀийх летар да из, ший Даьхе езаш хилар санна.
Оаха лоархӀ, экономика - из хьалхарча даькъе нах ба. ЦӀаьхха нийсденна хӀама дац, цу журнала керттера турпалхой Келаматанаькъан Махьмуд-Ӏаьла, Гуцаранаькъан Микаил хилар», - язду ший журнал дӀадолалуш начӀал долча журналиста Севрюкова Еленас.
Кастлуш дешачарна шоашта а ховргда, цо баьча балха мах бе.
