ГIалгIайчен Правительства хьалхара гIонча волча, Йовлой Мухьмада хоам бир, вай регионе из гIулакх, таханарча дийнахьа, во ца латталга. Ящур, сибирски язва, бешенство, коатIарча оалхазарий грипп яха, иштта кхыдола унзара лазараш вайцига даьржа доацалга дийцар цу гIулакха тIахьожам бераша.

Ветеринарни кхуврчашкарча къахьегараша, тахан, кхераме лазараш даржаргдоацаш шоай бе беза болх дIахьу. Хьайбаши оалхазарийи леладеча моттигашка дезинфекци, прививкаш еш лораду цар из хьал. Иштта, дIадахача шера цар вакцинаци дIайихьар 1345615 бежана. Белгалде деза, цу гIулакха тIахьожам бе аьнна вIашагIделла, Ветуправленен дIайха така долга. Хьайбашта, коатIарча оалхазарашта лазар кхийтта моттиг хуле, денна бежан цхьанахьа зуй, цига телефон дIатеха хоам дIабе беза бахархоша.

Иштта, цу хIаман тIахьожам лелабеча болхлошта кораяьй, Шолжа-пхьеи МагIалбика районеи доахана бруцеллез яха лазар кхийтта моттигаш. Цамогаш хиннача ворхI хьайба урс хьекхад, уж лаьтта моттигаш дизенфекци еш цIенъяьй. Вице-премьера аьнначох, эггара кхерамегIа тахан латтар, коа тIарча оалхазарий гриппи, акха хьакхаша доаржаду, африканская чума яха — лазараш да. Вай мехка, 2008-2009 шерашка, акха хьакхашта из лазар кхийтта йиъ моттиг яр.

Тахан, из хьал мишта латт тохкаш ба ветеринараш. Йоаяьча массехк акха хьакхашта пробаш йоахаш, из кхераме лазар дий хьежар уж. Карарча хана, вайцига даржанза да цу тайпара у. Шолжа-пхье лаьрхIа цу гIулакха вIашагIъелла тоаба я, мел эшаш бола кхоачам а болаш.

Хиннача къамаьла юкъе теркаме лаьцар, шураи, шурийцарча дерригача даараштеи, хан-ханнахьа ветеринарно-санитарни экспертиза дIакхахьа езалга. Из хьал лорадара болх, массе оагIорахьа, цхьаккха духьалеи халои йоацаш дIагIоргболаш, къахьегаш ба цу гIулакха бехктокхаме бола болхлой.