Из яздара бахьан да Сийлахь-боккхача Даьймехка тIема шераш диццадар. Укх наькъа 61 моттиге 3000 сага яздир из, уж бар тайп-тайпара ха яьнна нах. 45 минота 25 хаттара жоп дала дезаш бар доакъашхой, йоах ГIалгIайчен парте викалаша.
Цу гIулакха лаьрхIа моттигаш кийчъяьяр ИнгГУ, Барта Майдан тIа.

Цул совгIа, тайп-тайпарча дешара урхалленашка а кийчъяьяр диктант яздара моттигаш.

Истолаш тIа цхьана баьгIар дешархой, студенташ, балха боацаш цIагIа багIа кхалнах, ахархой, шоай доалахьара хIама леладераш, паччахьалкхен урхаллений болхлой, Котало цаI йолга, цхьа дагалоаттам болга, из бицбе йиш йоацилга кхетадеш бола беррига нах.

«Боламе дакъа лоацаш хилар РФ Паччахьалкхен Дума депутаташ, къаьстта йолча моттигерча партей доакъашхой, «ЦаI йолча Россена» хьалххе кхадж тассара доакъашхой, студенташ, дешархой, волонтераш, юкъарлонна болхлой, тIема доакъашхой, иштта кхы дуккхабараш. Иштта ГIалгIайчен паччахьалкхен университета студенташца цхьан даькъ тIа Паччахьалкхен Дума депутат Татренаькъан Муслим а хилар, шийна фу карагIдоал хьажар духьа диктант яздеш. «ЦаI йола Росси» яхача парте моттигера болх дIабахьара йолча комитета кулгалхо Кхоартой ИбрахIим а хилар цига дакъа лоацаш», — аьлар парте моттигерча викалаша.

«Хьалхашка лаьтта декхараш халагIчарех дацар, терко тIайодаш а дар.

Берригаш а из декхар кхоачашде карагIдоалаш а хилар, кхыметтел оттаяьча ханал хьалха. Цу тайпара вIашагIкхетараш эшаш да. ХIара вай мехка вахархо декхарийла ва, ший истори довза», — аьлар Кхоартой ИбрахIима.