ТӀой-Юрта кашамий керда доазув хьадийллар
ТӀой-Юртара цхьа кашамаш дӀакъайладар, шоллагӀдараш дӀакъовла дезача хьале кхаьча латт, из бахьан долаш, веннар дӀаволла хало хулар бахархошта.
Мехкадаьга Келаматанаькъан Махьмуд-Ӏаьлага дехар даьдар цу юртарча наха; кашамашта лаьрхӀа моттиг къоастае шоашта, аьнна. 8 гектарага кхоачаш дола доазув къоастадаь, Гуцаранаькъан Микаила гӀо деш йолча ганзага гӀолла, тоаяьй из моттиг тахан. Кашамашта дӀатӀабодаш асфальта кхо никъ биллаб, машинаш Ӏоувттае 25 моттиг къоастаяьй. Кашамий коа эшаш мел бола кхоачам цу чурча цӀалга чу болаш ба.
«Керда кашамаш – уж байнача нахацара лерхӀам ба тахан. Доккха баркал оал аз из маьл бола гӀулакх хьаллоацаш къахьийгарашта. БоаггӀача боараме тоадаь хила деза кашамаш. Из болх дӀахохьоргба вай республикерча массайолча моттигашка», - дийцар Мехкадаь зарбан болх лелабераша, республикан Кулгалхочун къамаьл теркаме лоацаш.
