17 эзар совгIа гIалгIай бахача мехка хьоашалгIа хилар уж кхаь дийнахьа. Цу юкъа гIалгIай викалаш - хьалхара вице-премьер Йовлой Мухьмад, Халкъа Гуллама депутаташ, доал деча даькъ тIара викалаш- вIашагIкхийтар Астана-Шахьаре бахача гIалгIай къамах болча нахаца.

Хьаьший тIаэцар хилар, Нохч-ГIалгIай этнокультурни центр йолча доттагIала ЦIагIа. Цига ГIалгIайчера баьхкача хьаьшашта культурни программа гойтар, масала, уж бахар Кунта-Хьажий цIерагIча маьждиге, «Вайнах» яхача ансамбла репетице, иштта кхы а дукха дар цу юкъедоагIаш. ВIашагI а кхийтта, уж бахар мехкахбаьхача хана бейнача гIалгIай кашамашка.

Йовлой Мухьмада белгалдир, Казахстан къамашта юкъера барт лелабара даим а терко еш хиннилга.

«Эггара халагIча хана, тхона новкъостал даьд оаш, шоашка дола тух-сискал дийкъад. Со тешаш ва, шо ГIалгIайче доагIе, шоай гаргара нах санна шо тIаэцаргда цига моллагIчо а», - аьлар вице-премьера.