Вайцигарча кхолламах йолча колледже, «Мохк цаӏ ба, вахар - тайп-тайпара» яха урок хилар
«Мохк цаӏ ба - вахар тайп-тайпара» яха урок дӏахьош хилар мехкарча кхолламах йолча паччахьалкхен колледже. Чопанаькъан Мадина яр урок дӏахьош хиннар. Боккхача мехкаца Россеца хоттабенна вахара никъ болча турпалий исторех, цар гӏулакхех дийцар кагирхошка. «Урок тӏа вӏаший хеттадар вӏалла а бувзам бац аьнна хетараш- гӏалгӏай проза, эрсий космос, лоаман байташ, советски физик.
«Бӏаьшерий боадонгара» яха роман яздаьча Базорканаькъан Идриса, космосаца бувзам болча Королёв Сергея, лакха начӏал долча байтанча Гамзатов Расула, ӏилманхо волча Алферов Жореса вахара наькъех, цар кхоачашдаьрех дийцар цига. Байтанчий, тӏема доакъашхой истори довзийтар студенташта.
Татарски байтанча Джалиль Муса, Ленинградера байтанча Ахматова Анна, къона разведчица Космодемьянская Зоя боккхача мехка вахаре малагӏа никъ дӏахьош хиннаб белгалдир гулбеннараша. Цаӏ йолча Россе тайп-тайпарча гӏулакхашта тӏехьа белгала бола турпалаш, эздий нах бахилга теркалдеш моттиг яр из», - дийцар «Сердалога» цу моттигера.
Тайп-тайпарча къамий нах дикача гӏулакхашта тӏехьа шоай цӏи дӏахозийташ, Россе хӏама тоадеш хьабаьхкаб. Мехка доккха истори духхьал цхьан сагагара хьадоладала йиш йолгах дийцар студенташка. Хаттар-жоп долаш, дуккхадараш доашхаш, массане дог ураоттадеш, кхетаче хилар цох.
