Шолжа-Шахьарерча дегӀа могашал эшаеннача берий ишколо ший болх дӀаболабир
Дешара шу доладалара хетаяь линейка дӀайихьар Шолжа-Шахьарерча дегӀа могашал эшаеннача берий ишколе-интернате.
Кхетаче дакъа лоацаш бар хьехархой, цига дешаш хиннараш, берий цӀагӀара нах, лоархӀаме хьаьший.
«Ишкола кулгал деш йолча Оздой Фатимас къамаьл дир гулбеннарашка. Цо белгалдир, цу ишколе дешаш долча берашта дешара кхетам баларал совгӀа, цар оагӀув хьаллоацаш, дог хьоасташ хилар чӀоагӀа лоархӀаме долга», - йоах тхога кхаьчача хоамо.
Цига гулбенна бар республикерча Россе анзорий оагӀон болхлой, прокуратурера къахьегамхой. Дешара шу доладаларца; бераш, царна уллув латташ бола хьехархой даькъала бувцаш, дог гӀоздоаккхаш дола къамаьл дир хӀаране. Гуйран хьалхарча бетта хьалхара ди берий, цар даьй, ноаной, хьехархой дегашта ший тайпара лоархӀаме да. Беркате хилда керда дешара шу царна массанена, сабар, дегагӀоз совйоалаш из дӀадахьа аьттув, низ хилба массане.
Баьхкача хьаьшаша дешаре эшаргдола совгӀаташ дийкъар берашта. Ӏадатага хьежжа, боккхагӀа болча дешархоша зӀамагӀчарна хьехар деш, цхьацца цар дог гӀоздаргдола хӀамаш екъаш дӀайихьар кхетаче.
Хьалхара гургал тохар а массане дог тохадолийташ дар, дукха хӀама дагадохийташ. ИйслагӀча класса дешархо йолча Дзортанаькъан Аьсета, нулевой водача Бохтаранаькъан М. дӀадоладир дешара шу. Хьаьшаша, бераша, даьша, ноаноша тӀоараш детташ, дӀатехар из хьалхара зовне гургал, ишкола наӀараш шерра еллаш.
Байташ ешаш, иллеш доахаш дӀадихьар из дешара цӀай. Боккхача дезала юкъе санна, массане дегашта йӀовхал луш, терко еш кхетаче хилар цох.
