Магасе дийцар, хӏама шозлагӏа юхакхоллара экономика юкъейоалаярах
ГӏР премьер-министра Сластенин Владимира кулгал деш, боахамашта юкъера кхетаче дӏайихьар Магасе, юхакъаста нувхаш пайда эцаш лелаяр дувцаш. Из хоам «Сердало» газетага бир мехка Паччахьалкхен зарбан болх лелабераша.
Цига дакъа лоацаш хилар из болх лелабеш йола министерствош, къахьегама тоабаш, республикан юртий, шахьарий, кхалений кулгалхой.
«Ер шу Гӏалгӏайчен Кулгалхочо хьакхайкадаьд; экологен шу да, аьнна. «Экологически таро» яхача къаман проекта чудоагӏаш, Россе Президента хьаллоацаш дӏахьош я лоархӏаме кхетаченаш. Цунца цхьана ТКО лелаяра хаттар тахан а лоархӏаме латт. Цу даькъ тӏара болх дика вӏашагӏболла безаш ба», - аьлар ГӏР премьер-министра цу балха керттерчох дувцаш.
Из хаттар иштта хоадам болаш дувцара бахьан дар, 2030 шерга кхоачаш из болх пайда луш хургболча дӏатӏабаккха безаш хилар.
ГӏР ӏалама тароний, экологен министра декхараш кхоачашдеш волча Баркинхой Адама яхачох, из хаттар кхоачашдаро таро лургья юхакъасташ йола нувхаш пайда эцаш лелае, экологе хьал дикагӏа де. Иштта лерхӏаш да, наькъашца дувзаденна балхаш, кхыйола моттигаш тоаеча дӏаяхийта гӏишлон юхакъасташ йола хӏамаш.
Нувхех пайда эцар, цун боарам нийса лелабар, тайп-тайпарча юхакъаьстача гӏирсашца лерттӏа уж лелаеш хилар - уж деррига декхараш дика кхоачашде дезаш да, мехка хӏара вахархочо дакъа а лоацаш.
