Къаман дувхара хетаяь лоацца кхетаче хургья Магасе
«Со къаман дувхар леладеш ва» яха болам дӏахьоргба Магасерча администраце, укх бетта 25-ча дийнахьа. «Сердалога» из хоам бир мэре.
«2026-гӏа шу Россе къамий Цхьоагӏон шу да, аьнна, кхайкадаьд РФ Президента Путин Владимира. Къаман культура, ӏадаташ, оамалаш хьаллоацаш; къамашта юкъера бувзам, барт чӏоагӏбеш; хургда вӏашагӏкхетар.
Ший къаман дувхарца кийчвенна, цига аравала йиш йолаш ва моллагӏа саг. Кагирхой, дезалаш, кхоллама тоабаш, дешархой, студенташ арабалар геттара дика хургда», - йоах тхога бенача хоамо.
Ший къаман культура эггара хозагӏа долча тайпара дӏахьокха хьажа беза доакъашхой. Керта тӏа техкаду гӏирсаш, куцала лелаю тайп-тайпара хӏамаш, къаман сурташ белгалдеш дола барзкъаш – из деррига болам хозагӏа хулийташ хургда.
Россе дахаш долча къамий культура мел йоккха, тайп-тайпара я гойташ моттиг хургья цох. Дакъа лаца воаллачо сурт е видеоролик яьккха socotdel.magas@maӏl.ru электорнни почтага гӏолла дӏаяхьийта деза. Моллагӏа хӏама хатта йиш йола номер : +7 (8734) 55-14-84.
