Федеральни, юкъарча судахой кхетаче хилар Магасе
Гӏалгӏай мехкарча юкъарча юрисдикце федеральни, дунен судахой кхетаче дӏахьош хилар Магасе. 2025-ча шера кхоачашдаьрех дийцар цига. Цу лоархӏамеча кхетаче дакъа лоацаш вар мехкада Келаматанаькъан Махьмуд-ӏаьла, мехкарча Лакхерча суда кулгалхо Гӏазданаькъан ӏийса, федеральни оагӏонашкара, прокуратурера болхлой, иштта пирстопаш, ӏаьдала болхлой.
Укх шера дӏабахьа безача балха юкъе эггара керттердарех, бокъонаш боаггӏача боараме лархӏарах дийцар Гӏазданаькъан ӏийсас гулбеннарашка. 2025-ча шерарча хана мехкарча юкъарча юрисдикце суде кхаьчараш 87885 гӏулакх, каьхаташ да. Йиллача хана болх чакхбоаккхаш, лакхача боараме суде техкараш 88850 гӏулакх да. 90%-га кхоачаш долча каьхаташцара болх юххьанца оттаяьча ханаца чакхбаккха аьттув баьлар. Иштта мехкарча Лакхерча суда кулгалхочо дийцар тохкама гӏулакхашца дӏабихьача балхах, бехкебараш бехктокхаме озарах, цхьацца гӏулакхий ларах кхоачашде аьттув баьннарех.
Вай мехкадас Келаматанаькъан Махьмуд-ӏаьлас белгалдир, атта доацача хьале шоай болх боаггӏача боараме уж дӏахьош болга. Россе Президента Путин Владимира бокъонаш лораяр, царцара хӏама тоадар паччахьалкхен лоархӏамеча декхарех долга белгалдеш аьнна дешаш доаладир Мехкадас. Массахана дагалоаттаде деза, хӏара гӏулакх сага вахарца дувзаденна долга. Мехкадас теркалдир, тахан къаьстта йоккха терко лоаттае езилга наркоманена. Цу оагӏонцара болх ма хулла чӏоагӏбе беза мехка. Мехка кулгалхочо дийцар СВО доакъашхой, цар дезалий, иштта бахархой бокъонаш боаггӏача боараме лораярах.
Мехка хьалхашка латтараш нийсдара тӏехьа лоархӏаме моттиг дӏалоацаш я суд, деррига а бокъонашца къоастадаьча тайпара хила деза. Вахарерча цхьацца кхоачамбоацарех дийцар мехкадас, хӏара моттига лакха терко лоаттае езилга белгалдир. Шоай декхараш ӏаьдало дӏадеххача тайпара токхаш болча судахошта доккха баркал кхайкадир Мехкадас; беркате, иразе баха даькъалабийцар ветеранаш, тахан къахьегараш. 2026-ча шера дӏабахьа безача балхаца судахой кхоачашде дезача декхарех дийцар кхетаче.
