Магасе къаьстта теркалду берашта, ондаргашта кхетам балар
Шахьара администраце укх деношка аргӀанара кхетаче хилар кхувш боагӀарий гӀулакхех йолча Кхела, яхаш, дийцар «Сердало» газетага Магасерча мэре.
«Из кхетаче дӀайихьар шахьара кулгалхочун гӀончас Заьзганаькъан Маккас кулгал деш. Цига дакъа лоацаш бар тӀахьожамца, бокъонаш лораярца бувзабенна хьехам лу болхлой», - аьлар хоамо.
Керттера дийца дош дар харцдаьннача берий даьшта-ноношта доагӀаш дола административни бехк бу каьхаташ оттадар. Цхьаболча даьша-ноаноша шоай дезала боагӀаш бола кхетам луц, цар дешара уж сагота боацаш нийслу.
Цу тайпара кхетаченаш дӀахьош хиларо дикагӀа терко тӀайохийт кхувш йоагӀа тӀехье теркалъяра, из нийса кхетам луш кхеяра, нийсденнача чоалханеча хьалера бакъарча наькъаца араяккхара.
Из болх дӀахьош хилар лоархӀаме йола оагӀув я; кхувш йоагӀача тӀехьен психологически, физически хьал тоадеча даькъе.
