Бейнача бӀухой дезалашка дӀаелар Денала орденаш
ГӀалгӀайчен Кулгалхочо, лаьрххӀача операце шоай синош Ӏодаьхкача бӀухой шин дезала Денала орденаш дӀаелар. Цох дийцар «Сердало» газетага Мехкадаь зарбан болх лелабераша.
ГӀаппархой Мухьмад тӀалатача бӀун мугӀарера салте вар, цун совгӀат дӀаделар йишийга Залинайга, хӀаьта ефрейтора Тоачанаькъан Заьлмаха орден дӀаелар даьга Тоачанаькъан ХӀаронага. СовгӀаташ дезалашка дӀалуш, Келаматанаькъан Махьмуд-Ӏаьлас аьлар, Ӏаьдала оагӀорахьара массадолча хаттарех новкъостал дергда, къаьстта, вахарца дувзаденна дешаш кхоачашдара.
«Цар шоай вахар Даьхе бахьан дӀаделар, вай кхоане машаре хилийта. Тхога а, цу бейнарий дезалга санна, уж боврах гӀайгӀа я. Цар гойта турпалал, денал вайна масал да. Вай уж бицбергбац цӀаккха а, Даьхе бахьан долаш шоай синош дӀаденнарий сий дергда даим», - аьлар мехка кулгалхочо.
