«Авангард» яха кагирхой моттиг хьаелларгья МагӀалбике
«Авангард» яха кагирхошта лаьрхӀа моттиг хьаелларгья МагӀалбике. Даьхен лорбой кийчбеш, кагирхоша ха дӀакхухьаш моттиг хургья из.
Россе Президента Путин Владимира тӀадилла, хьалъеш я ювца моттиг. Берашта, кагирхошта деша, салаӀа, могашал меттаоттае Ӏалашо ярах йолча федеральни программага гӀолла беш болх ба из.
Берригача мехка хьаеллаш латт тахан цу тайпара моттигаш. Шахьарерча парка гаьна йоацаш, «Къона патриот» яхача моттиго болх дӀахьоча доазон тӀа хьаелларгья «Авангард». Цига болх бергба эскаре баха ха йолча, иштта зӀамагӀа болча кагирхошца.
Герз вӀашагӀдаккха, юха вӀашагӀдолла Ӏомабергба кагирхой, иштта семинарашка, спорта-туристически кхетаченашка, Даьхенцара безам чӀоагӀбарах долча боламашка дакъа лоацаргда цигарча къонача тӀехьено.
Цул совгӀа, ахкан хана берашта салаӀа аьттув а хургба цига. Карарча хана болх дӀаболабаьб, хӀара моттиге 49 саг хургва. Керда модулаш ер бутт бовш кийча хила езаш я.
«Даьхен сий деш, Даьхе лоархӀаш, шоай мехка истори довзаш, тӀема оагӀонцара декхараш миштад ховш кхеергья вай тӀехье. «Авангарде» цу гӀулакха мел эшар хургда аьнна хет сона», - аьлар вай Мехкадас Келаматанаькъан Махьмуд-Ӏаьлас.
Белгалде деза, из моттиг хьаеллар Россе Герзашцарча низий министерствос а хьаллаьцалга.
