Къам мехкахдаьккхача денца бувзабенна болам дӏабихьар Магӏалбике
1944 шера вай къам мехкахдаьккха аргӏанара шу долаш, Магӏалбике дикача гӏулакхий болам дӏабихьар, из вӏашагӏбеллабар Гӏалгӏай Республикан Кулгалхочо Келаматанаькъан Махьмуд-ӏаьлас тӏадиллача декхарах. Массаза санна цига бейнарашта тӏера сагӏа даьккхар.
Цу кхетаченна чудоагӏаш, СВО доакъашхой дезалашта сагӏа дихьар. Цул совгӏа, шахьара администраце Исламски университета студенташта дулх а кхачан даараш а дахьийтар, цар вай кхыча мехка бейнача наха тӏера мовлат дешаргдолаш. Цу тайпарча боламаша доккха дакъа дӏалоац исторически дагалоаттам лорабара. Цар новкъостал ду вай къаман балан оагӏонаш йиццаялийтара, цар лерхӏам хара», - аьлар «Сердало» газетага шахьара администраце кулгалхочо Галай Мусас.
Уллуврча наха новкъостал дарца, аттача доаккх цхьанне мукъагӏа вахара хьал, иштта лерхӏам бу эггара халагӏча хана деналах ца бохаш, вайна Даьхенцара безам, ӏадаташ, нийсхо йитача вай даьй.
1944 шера саькура беттара 23 ди балан ха я. Бакъда цо иштта вайна хьалхадоаккх халача ханашка а сага дикал кхоачалуш цахилар, цун сердал даим йоагаш хилар, нагахьа санна вай-воаш а из хьаллоацаш яле гӏулакхашца, къахетамца.
