Магӏалбике лаьрххӏа бола болх дӏахьу, лаьца баьхкача нахаца
Магӏалбика ӏаьдал даим болх дӏахьош да, терроризма наькъ тӏа зулам дарах лаьца баьхкача нахаца. Цун керттера бахьан да, уж кхы харцахьарча наькъ тӏа цабалийтар, юкъарлонца бувзам лелабеш, шоай вахар цар нийса дӏадахьар. Цу хьакъехьа дар терроризма духьаларча комиссе секретара, шахьара администраце кулгалхочун гӏончас Зейтанаькъан Аслана дийца къамаьл. Шоайла тешаме къамаьл деш, дӏахо лерттӏа вахар леладара барт беш хул цу тайпара кхетаче.
«Юкъарло кийча я цу тайпара гӏалатбаьннача наха меттаоттара гӏо де. Цига дувц лаьца ваьллача сага гонахьарча вахара юкъарлонца бувзам хила безарах, закон лораде дезилга царна хьалхадоаккхаш», - аьлар «Сердало» газетага Зейтанаькъан Аслана.
Цу тайпара кхетаченаш дӏахьош хиларо, лаьца баьхкача наха таро лу балаха говзал караерзае, шийна цох пайда эцаш хила, ший лоалахошца, гонахьарча нахаца безаме гӏулакх леладеш ваха, иштта Магӏалбика юкъарлон бӏарчча бокъо йола вахархо хила.
