Терроризма духьаларча къовсамах дийцар МагӀалбике
Экстремизм, терроризм яхача доккхача зуламашта духьала лоаттабе безача къовсамах дийцар МагӀалбика кхале. Из хоам «Сердалога» бир Миннаца болхлоша.
Цу лоархӀамеча кхетаче дакъа лоацаш вар МагӀалбика кхаленна кулгал деш вола Къоастой Ӏаддал-Хьамид, миннаца кулгалхо Мизенаькъан Руслан, дешара, спорта моттигашкара доакъашхой, Ӏаьдала болхлой, дийша нах, иштта кхыбараш а.
«Цу доккхача зулама духьала къовсам лоаттабар, Ӏаьдала болхлой декхар хинна Ӏац. Вайх хӀаране юхатоха дезаш дола доккха во да из!
Массане цхьа барт болаш дӀакхахьа безаш ба из лоархӀаме болх», - белгалдир миннаца хьалха латтача Мизенаькъан Руслана.
Иштта цо хьоахадир, цу тайпара кхетаченаш дӀакхахьар боккха пайда боаржабеш долга. 2025-гӀа шу доладелча денз, цу оагӀонца дӀабихьача балхах дийцар цига, иштта дӀахойодача хана кхоачашде дезарех дийцар гулбеннараша.
Мехкара хьал массахана паргӀата, кхерам боацаш хургдолаш, къахьега деза тахан. Тайп-тайпарча моттигашка цу оагӀонцара кхетаченаш йоаржаеш, къонача тӀехьено лораде дезараш хьалхадоахаш, болх лоаттабе беза тахан.
