Магӏалбика кхале дийцар бахархой кхерамзлен дешаш
Гӏалгӏайчен Магӏалбика кхален администраце даькъ тӏарча кхело кхетаче дӏайихьар. Из дӏахьош хилара бахьан дар, бахархой кхерамзлен ӏалашо яра дола хаттараш тахкар. Керттера дийца дош дар цӏера кхерамзлен ӏалашо яр. Кхетачен доакъашхой хьежар латташ дола хьал миштад, иштта дийцар цӏи яьнна моттиг нийслуш хуле, сиха терко яра де дезар.
Администраце кулгалхочун декхараш кхоачашдеш волча Къоастой Руслана белагалдир, массайолча моттигашка цӏи йоаяра йола ӏалашо яьйий хьажа безилга, Магӏалбика кхален организацей, предприятей даькъ тӏа йокъаенна йоархӏаш дӏаяха езилга. Гулбеннарашта хьалхашка къамаьл дир Гӏалгӏай Республике гӏолла Россе МЧС ГУ №2 йолча цӏерца къовсам лоаттабара даькъ тӏарча кулгалхочо Бӏарахой Ахьмада. Цо хьалхадаьккхар кхален доазон тӏа дукха моттигаш хилар, йокъаенна баьцаш йолаш; цудухьа юрташкарча администрацей кулгалхошта могадир уж кхоачамбоацараш юстардахар, иштта цӏера хий деттача кӏаллинга болх тоабаь хилийтар», - аьлар «Сердало» газетага кхетачен доакъашхоша.
Магӏалбика кхален администраци лаьрхӏа я, бахархой кӏалхарбахара хьалаш хьакхоллаш, болх дӏахо дӏабахьа, тайп-тайпара чоалхане хьалаш отте, царга кийчо яь хургйолаш.
