Барайтта шерга кхачанзачар гӏулакхех дувцаш, кхетаче дӏайихьар Магӏалбика кхале
Барайтта шерга кхачанзачар бокъонех, цар гӏулакхех дувцаш кхетаче хилар Магӏалбика кхален администраце. Кхален администраце кулгалхочун гӏонча йолча Иленаькъан Зейнапа кулгал деш дӏайихьар кхетаче. Цига дакъа лоацаш бар ӏаьдала болхлой, кагирхой гӏулакхех болча оагӏон доакъашхой, барайтта шерга кхачанзачар гӏулакхех долча МВД даькъа къахьегамхой, иштта кхыбараш а.
«Кхетаче дийцар барайтта шу даланзачарна юкъе нийслуш долча зуламех, цу оагӏонца кхоачашде дезарех. Дер дайна леларгбоацаш, уж спорта, культуран, Даьхенцара безам чӏоагӏбарах йолча кхетаченашта юкъе чуозарах дийцар гулбеннараша. Царна тӏехьа боаггӏача боараме тӏахьожам лоаттабе безилга, дер дайна уж лелийтар харцахьа долга белгалдир кхетаче. Кхоачамбоацараш долча дезалий оагӏув хьаллацар, хӏара гӏулакха лакха терко яр лоархӏаме долг дийцар», - яхаш, хоам бу «Сердалога» цу моттигера.
Иленаькъан Зайнапа дийцар барайтта шерга кхачанзачар бокъонаш лораяра тӏехьара болх мелбалийта йиш йоацилга. Массадолча оагӏонаша цхьана дӏабахьа безаш боккха болх ба из.
