МагӀалбика кхале дийцар, тешаме йоацача хӀамаех лоравала везилга
Вежарий-Юртарча культуран ЦӏагӀа хоамий сахьат дӀадихьар «Тешаме йоацача хӀамах лоравалар бокъонаш» яха. МагӀалбика кхален культуран-салоӀама центро вӀашагӀъеллача кхетачене дакъа лоацаш хилар АТК отдела кулгалхо Джамболатанаькъан Мухьмад.
Кхетаче дӀаяхьара керте лаьттар дар, тешаме доацача хьала тӏа нийсбелча де дезар хьалхадаккхар, граждански сакхетам лакхбар.
«Цига къамаьл деш, Джамболатанаькъан Мухьмада терко тӀаяхийтар тешам боацача хӀаманна тӀанийсвелча, кхы тӀехьа ца тотташ, сиха цу гӀулакха тӀахьожам лоаттабеча моттигашка хоам бе безарах», - аьлар «Сердало» газетага МагӀалбика кхален администраце.
Кхетаче чакхйоалаш, доакъашхой таро хилар хаттараш дала. Джамболатанаькъан Мухьмада жоп делар дерригача хаттарашта, цо цӀаькха а белгалдир, хӀара саг ший де дезар дика ховш хилар кхерам юхатохара керттердар да, аьнна.
