МагӀалбика кхале, сагӀа луш, хьаллаьцар 477 дезал
МагӀалбика кхале, ерригача ГӏалгӀайче санна дӀабихьар «Мехка сагӀа» яха болам. Из дика гӀулакх могадаьр ва республикан кулгалхо Келаматанаькъан Махьмуд-Ӏаьла, сагӀа далара, къиношта гешт дара еза ха я Рамадан бутт.
«Цу болама чудоагӀаш МагӀалбика кхале 477 дезала сагӀа делар. Иштта новкъостал дир бӀухой дезалашта, таро йоацарашта. ДукхагӀчарна цу тайпара новкъостал чӀоагӀа накъадаьлар. Хӏара дезала дӀадийкъар кхачан тӀормигаш. Цу чу дар дулх, дуга, хьоар, шекар, даьтта, хурмаш, чай. Цу юкъе новкъостал деш хилар юрта администрацей болхлой, маьждигашкара имамаш, сагага нийса сагӀа дӏакхоачийташ», - аьлар «Сердало» газетага МагӀалбика кхален администраце зарбан болх лелабераша.
СагӀа даккхаро хьагойтар вай къам барт болаш, эшача новкъостал де кийча долаш хилар, цо къаьстта вӀашкаоз ГӏалгӀайчен бахархой, цу сийрдача хана.
