«ГӀалгӀайчен кулгалхочо Келаматанаькъан Махьмуд-Ӏаьлас дакъа лаьцар герга истол оалача кепара: «ГӀалгӀайче - вӀовний мехка вахар» яхача къамаьла юкъе. Укхаза дийцар республикан хозача Ӏаламах, исторически сийленгех, сий долча тӀема вӀовнех, туристически оагӀонех. Доакъашхоша дийцар, керттера терко тӀа а йохийташ, из никъ ийца республике вахара бахьан малагӀа да», - йоах хоамо.

Из дар дукхагӀча даькъе ГӀалгӀайчен таханарча дено дӀадеххача тайпара вӀашагӀъелла туризм хилар, тамашийна, бӀарг тӀаотташ лоаман моттигаш хилар, ГӀалгӀайчен эко,- этнотуризма моттигаш йовзар. Цул совгӀа, цига белгалдаьккхар, туристически оагӀув республике дегӀабоалабеш, инвестораш юкъебаха лерхӀаш хилар.

«Вай республике венача хӀара сага гургда, шоаш Ӏаламо хьакхеллача беса латташ дола лоамаш, вӀовний гӀовнаш, Маьлха шахьар Магас, цунна хоалургба цӀенача хьастара доагӀача хин чам, цул совгӀа, ара юккъе латта музей, уж я ши эзар совгӀа бӀаьшерен архитектура. Кхы а ГӀалгӀайче - из хьалхарча аргӀагӀа машар ба, къахьегама тӀера болча, майрача, дикача наьха дуне а да», - аьлар ГӀалгӀайчен кулгалхочо Келаматанаькъан Махьмуд-Ӏаьлас.

Тахан, Махьмуд-Ӏаьлас яхачох, керттердар- таханарча денна эшаш бола болхлой кийчбар, туризма даькъ тӀа къахьега уж кийча а хилар. ГӀалгӀайче дикача толамашца дегӀайоалаяра таронаш йолаш я.

«Ӏарамхи» яха керттера курорт хиларал совгӀа, республикан кулгалхоша, иштта «Сафмар» яхача ганза Гуцаранаькъан Микаилаца цхьана барт баь хьабеш бола болх хиларах, лоамашка вӀовнаш тоаеш латт, хьаьшашта лаьрхӀа цӀенош деш латт, тоадеш латт туристашта лаьрхӀа дола наькъаш, гӀашлой такилгаш. 

«Керттердар да, цкъа венар юхава дог доагӀаш хургвола дика хьалаш хьакхоллар. Со тешаш ва, ГӀалгӀай республикан туристически дика оагӀув дӀагойтаро вайна хьалхашка латта декхар кхоачашдара цхьаькха а дакъа юкъедахьаш хиларах», - аьнна тӀатехар Келаматанаькъан Махьмуд-Ӏаьлас, ше республикан туристически таронаш ювцача хана.