Къаман библиотеке, Чахкенаькъан Капитона 100 шу дузаш, гойтам хьабийллар
ГӀалгӀайчен Янданаькъан Жамалда цӀерагӀча Къаман библиотеке хьабийллар, начӀал хиннача гӀалгӀай литературан классика, поэта, прозаика Чахкенаькъан Капитона 100 шу дузаш хилара хетабаь «Ека, са стих, айле!» яха книжкай-каьхатий гойтам.
Цига хиннача наьха таро хилар йоазонхочун кхоллам, цун вахар довза.
«Гойтаме, Чахкенаькъан Капитона кхоллам го йиш хилар цун книжкаш а газеташ тӀа кепа теха хинна йоазош а чулоацаш. Цу юкъе дар цо эггара хьалха арадаьккха, псевдоним Муртазар Руслан оттаяь хинна «Нана-Наьсаре» яха стихай сборник.
Из арадаьннадар 1957 шера Шолжа-ГӀалий тӀа 700 экземпляр йолаш, из тахан библиотеке лорадеш леладу.
Поэт дийна волаш, дукха цхьана юкъара литературни сборникаш арадаьлар йоазонхой а поэтий а. Уж дар «Даьхе» (Шолжа-ГӀала, 1958), «Къона дегаш» (Шолжа-ГӀала, 1959), царна чуйоагӀаш яр Чахкенаькъан Капитона стихаш. Шаккхе а сборник библиотеке долаш да тахан, лора а деш. Чахкенаькъан Капитона проза «Баьте зоахалол» яхача книжка тӀа я (Шолжа-ГӀала,1989), цу юкъейоагӀаш я стихотворенеш, проза. Йистедаланза дисача «Моакхаза лоамаш» яхача романа доакъошта кепа техай «Сердало» газета тӀа 1984 шера, иштта «Литературни ГӀалгӀайче» яхача журнала тӀа 2004, 2005, 2006 шерашка. Уж а дар гойтаме», - аьлар «Сердало» газетага ГӀалгӀайчен Къаман библиотеке.
Тхоца къамаьл даьча библиотека болхлочо белгала ма дарра, Чахкенаькъан Османа Капитон бокъонца вола йоазон говзанча хиннав, цо йитай гӀалгӀай литературе ший сийрда лар. Цун йоазонаша хьагойт турпалхой бакъдола сурташ, гӀалгӀай къаман вахара оагӀонаш.
